A L’OSTARIA
Na volta a Monsélese ghe jera tante ostarie, ‘ndove la pora gente la se catava par passare el tenpo, e ogni sito el gheva i so personagi straordinari fissi.
Uno de le pì caraterìstiche la jera quea soto la tore.
Pochi romai la ricorda, da tanti ani la xe stà butà xo.
Uno de i personagi abituè el se ciamava Emo, on tòco de omo grande e grosso, senpre co on cantonsin de fame aretrata: el jera sòlito dire: “Mi no me ricordo mai de èssare stà sazio”.
De mestiere el faséa el cariolante drio i canali de bonìfica.
Na volta no ghe jera nessun mezo de trasporto: tuti a piè.
I partiva bonora col scuro, e Emo, lu e so pare, i se portava drio na sportà de poenta inpirà sol mànego del baile; par la strada Emo ogni tanto el magnava na feta de poenta; ora che’l rivava so’l posto el la gheva magnà tuta.
Có jera le nove so pare el ghe disea: “Emo, va a brustolare la poenta ca femo marenda”. “Cossa voto ca vaga a brustolare, ca la go magnà tuta par la strada!” E so pare: “Emmo, te si la me disperassion!”.
Par dìrghene una de quee che’l conbinava.
On di l’osto el ghe dise: “Emo, sa te fasso mezo chileto de bìgoli in salsa, i magnarìssito?”.
“Cossa dito, gheto voja de torme in giro?”.
Dito e fato el ghe prepara sti bìgoli, e po’ el ghe taja in mezo on gemo de spago (cruo, senò el faséa maron).
Sta piàdena de bìgoli no ghe parèa gnanca vero: na tortegiada de piron e xo, in te on batare de ocio i xe sparìi.
Verso sera el spago ga scomissià a fare efeto, la pansa gonfia come on caratelo: ghe xe tocà portarlo de corsa al pronto socorso.
El dotore el ghe dà sùito órdine a on’ infermiero de farghe on cristero dopio.
Co’l ne lo contava, sto infermiero, a se copàvino da rìdare.
Sùito la jera na storia seria:
“Có go fato el primo, no se movéa gnente, ma col secondo a te ghè sentìo na canonà che sa no me tirava in parte medigo che’l me copava!”.
“Tuto xe ‘ndà ben, i ga di to che’l ghea fato indigestion.
Al luni e al vènare l’osto el ghe dava órdine a Pipia, n’antro abituè, de curare le sardele, tute le teste, le squame e le buele el le infarina va e po’ el faséa de’e polpete e el le metéa so’l banco. La gente ghe domandava cossa che le fusse!
Polpetine par bévare on’onbra gratis!”.
In te on bàtere de ocio le sparìa e anca i se gustava la boca come che’l fusse stà on lechesso.
Vico, n’antro cliente, el faséa servizieti par clienti: el ‘ndava a tore le sigarete, el pan biscoto, el tabaco e po’ i ghe pagava na onbreta.
On dì uno, credendo de fare el furbo:
“Vico, ‘ndarsìssito da Stagnareto a torme le somense de bacalà?”.
El ghe dà mile franchi e via che’l parte.
Sto Vico no’l vegnéa pì sù. Quando che’l xe rivà el ghe dize: “Vico, ‘ndove sito stà fin desso?”. “A go girà tuta Monsélese, ma somense de bacalà no so’ stà bon de catàrghene.”.
“Alora dame indrìo i schei!
Bravo, furbo, e mi a so’ stà fin ‘desso in giro par farme caldo: on ‘onbra qua e on ‘natra de là, i schei i fa presto a finirse, cussì on ‘antra volta te vè ti a somense de bacalà!”.
Però el mèjo de tuti el jera on serto Ciacio.
Lavoro a ghe ne jera poco e a casa el gheva na smanegà de putèi.
A la sera i jera là che i spetava so pare che’l portesse casa calcossa, e lu el sercava de rivare tardeto sperando che i se indormesse.
Invesse i jera là tuti sveji.
Alora el ghe diséa: “Stasera chi che va a dormire sensa magnare a ghe dago cento lire”.
E sti putèi: “Mi, mi, popà!”.
E i se indormessava co sti schei in man.
Ma a la matina el ghe diséa: “Chi che vole fare marenda, bisogna che’l me daga cento lire”.
Cussì el sparagnava la sena.
Ghe ne jera anca de i altri ma no vojo stare qua a nominarli tuti, senò no la saria pì finìa, ma mi a digo quanti ghe ne jera de sti tizi qua, co tute chee ostarie che ghe jera a Monsélese!
La miseria, la disocupassion, l’ignoransa e anca l’analfabetismo: i jera tenpi tristi, che forse adesso a ghemo on poco desmentegà.
Adesso le robe le va on poco mèjo, ma sa se voltéssino indrìo a faséssimo on picolo esame de cossiensa, el mondo el ‘ndarìa na scianta mèjo. (Da Quatro Ciàcoe)
Pietro Gattolin, poeta dialettale monselicense recentemente scomparso
Maggiori info su Gattolin https://www.ossicella.it/il-poeta-pietro-gattolin/
